« Linguas de nivel | Home | Conclusións apresuradas »
Santiago Auserón e outras cousiñas
By Leco | Outubro 21, 2007
O meu último post é de martes, desde entón moitas cousas aconteceron, como non podía ser doutro modo nunha semana tan longa, porque estou por asegurar que esta tivo polo menos oito ou nove días: o avó seguiu co seu lumbago mais comezou a mellorar milagrosamente cando o convencemos da necesidade de tomar antinflamatorios. Repite connosco, dixémoslle, se volvo ter lumbago tomarei a medicina desde o primeiro día. O parto inducido da tía T. foi longo e laborioso porque resultou que non estaba de 41 semanas senón de 37 e o novo pelachiño non quería saír. A tía ficou esgotada mais recuperouse rápido e o novo primo pasou un par de días na incubadora porque tragou líquido. A súa vitalidade e o desespero por xantar a todas horas fixeron que desde onte xa estean todos na casa.
A pelacha púxose moi pocha o xoves e diagnosticáronlle unha forte larinxite que debe ser tratada con oito días de antibióticos: vomitou varias veces, durmiu mal e andou moi desganada durante un par de días, mais hoxe xa pasou o día sen febre. Os avós da Coruña pensaban levar os dous de camping a Malpica esta finde pero só o pelacho puido ir (apañou cogumelos, axudou o xuri no concurso de tartas e mil cousas máis); e a pelacha ficou con meus pais porque nós tiñamos que botar todo o sábado en Santiago: pola mañá nunha reunión de traballo e pola tarde para entrevistar o Santiago Auserón, irmos logo ao concerto ben acompañados e combinarmos de novo co rithm&blueseiro para cear xuntos e avanzar nos proxectos que nos unen e que esperamos poder anunciar en breve.
Ao saírmos da casa decatámonos de que non levabamos as entradas e houbemos de dar volta. Ao chegar a Santiago reparamos que deixaramos a cámara de vídeo na casa. Respiramos profundo e Alfredo ficou na reunión mentres eu voltaba por ela a Coruña. Quixen de paso mercar Gramática do Silencio para llo regalármonos ao Santiago pero o Suso devolvera o libro o día anterior.
Xantamos, preparamos a entrevista, que aínda levabamos sen acabar de concretar, e chegou o momento. A partir de aí todo rodou: o Pawley apareceu a tempo co libro, fixemos a entrevista, asistimos a un concerto inesquecíbel, con mil persoas en pé a corearen as sintonías do imaxinario común, talladas e brunidas pola cada día mellor e máis experiente voz do "Can" e unha orquestra de músicos moi novos manexada polas mans labradas do mestre Enric Palomar.
Ceamos acompañados pola boa conversa que non se despediu até as cinco da mañá, cando apañamos a autoestrada de volta. No peto, unha entrevista que publicaremos n'O levantador de minas nos próximos días, os oídos aínda tocados, mais nunca arrepentidos, polos efectos da amplificación na primeira fila e os ecos amábeis e ridentes de tan cálida tertulia: literatura, tradición, jazz, Heráclito, África, Radio Futura, Galdós, Mingus, os nosos pelachiños, Ellington, Ibn Arabi, Pessoa, Coltrane, Menéndez Pidal, Caetano Veloso, Juan Perro, Mesopotamia, Panero, Baptista, Judá Leví, Tolstoi: o futuro máis próximo e o pasado máis remoto. Unha noite para lembrar.
Actualizado: esquecera dicir que foi toda unha alegria atoparmos a Jan e a Moralla, esta última sentada xusto ao noso carón.
chuzame -
Topics: Pelachos, Tía T., leco, prima, primo |
Outubro 21st, 2007 at 10:50 pm
Cando nos vimos á noite xa tiña lido un feixe de poemas de Baleirón e confirmounos que a nosa intuición de que había gostar era certa.
Outubro 22nd, 2007 at 6:55 am
Agardo imaciente por esa entrevista…Qué concerto!!! Espectacular!!!
Outubro 22nd, 2007 at 9:40 am
Si, foi fantástico o concerto! Canto á entrevista, nuns días terémola lista.
Outubro 22nd, 2007 at 5:36 pm
Como lle digo a Pawley, se a envexa fose tiña non paraba de rañarme. Santiago Auserón, meu deus!
Biquiños á pelacha.
Outubro 22nd, 2007 at 8:10 pm
Tesme moi intrigado co proxecto (que xa é a segunda volta que o mencionas) que tedes en común.
Agardo que toda a familia se poña boa axiña.
Por certo (offtopic) si teñen na FNAC BD de Astiberri (coma Bone) mais estaba un chisco mais cara ó fondo e non a víramos aquel día.
Outubro 23rd, 2007 at 10:33 am
Grazas, Peke, agora caeu tamén o pelacho pero todo se andará
E grazas pola info sobre Bone, a verdade é que seguimos con ese libro na cabeza porque pensamos que lle pode prestar moito ao pelacho mais aínda non deramos con el.
Ghanito, vaiamos por partes: o proxecto Con Santiago aínda non podemos anuncialo porque é un traballo que facemos para outros e correspóndelles a eles dar a noticia, que ha ser grande, mais, se nada se torce, teremos o Can na eira durante uns cantos días aló por marzo. Grazas polos Bos desexos de saúde física, que da outra afortunadamente non vai habendo queixa
Bks para todos!
Outubro 23rd, 2007 at 7:04 pm
Estou flipando co video … e aínda non acabara de flipar co concerto … e así unha tras outra … Que tipo este! A ver si conseguides que o poñan de carta de axuste en tódalas teles. Si?
Grazas polo video.
Biquiños e natillas.
Outubro 23rd, 2007 at 8:46 pm
Pois si que era unha boa idea, si